Bomb scare sulod sa Lapu CH nakapaukay

Naukay sa kahadlok ang mga kawani sa accounting office sa city hall sa dakbayan sa LapuLapu human makadawat og alarma sa gibutang nga bomba sa sulod sa ilang buhatan.

Si Inspector Felindo Navarro sa Special Weapon and Tactic (SWAT) team sa kapolisan maoy nangulo sa pagtubag sa maong alarma.

Si PO3 Roland Millor sa SWAT nga gikahinabi sa Banat News miingon nga ang K-9 dog maoy mihimo sa pagsiksik sa palibot sa sulod sa maong buhatan.

Matud pa niya nga negatibo ang maong alarma ug nahibalik sa normal nilang trabaho ang mga kawani.

Si PO3 Millor miingon nga nadawat gikan sa tawag sa telepono sa wala hiilhing tawo nga nagpahibalo labot sa gibutang nga bomba sa maong buhatan.

Gituohan sa kapolisan nga gikan sa mga tawo nga walay lingaw ang maong pagpahibalo sa pagpamomba nga nadawat sa mga kawani sa maong buhatan kinsa nangayo usab og panabang sa kapolisan.