CCPO mag-headcount: hepe

Mopahigayon og "headcount" ug ingon man inspeksyon sa mga kagamitan ang Cebu City Police Office karong Sabado aron pagsigurong andam na kini sa ilang trabaho pagpahigayon sa eleksyon karong Lunes.

Si Sr. Supt. Patrocinio Comendador, direktor sa CCPO mitug-an sa Banat News nga himuon kini aron dili lang pagsusi sa attendance sa iyang mga sakop kundili lakip na mga ekipo.

Ang kapolisan misigurong walay mga sakop nga nangikyas sa ilang duty pinaagi sa inadlaw-adlaw nga pagsumitir og attendance record ngadto sa Police Regional Office 7 diin pirmahan kini sa tulo ka mga komitiba.

Matud pang Comendador kaniadto pa kini gihimo sa PNP sa ilang ginsakupan apan sa matag tuig dunay mas dakong Oplan Bilang sa mga tropa sa PNP nga ang National Police Commission maoy mohimo ug gikatakdang mahitabo karong Mayo 21.

Sumala pang Comendador gawas sa maong kalihukan ipaabot usab niya ang mga pasidaan nga angayang bantayan atol na unya sa piniliay.

Dunay pito ngadto sa walo ka barangay diin kasagaran nasakop sa South District ang higpitan gyud og bantay sa kapolisan karong Mayo 14.