Suspetsadong pusher sikop sa ronda

Nasikop ang usa ka suspetsadong pusher og ginadiling drugas sa gipahigayong saturation drive sa mga polis sa Talisay pinangulohan ni SPO3 Ricardo Echavez niadtong Martes sa hapon diha sa Sityo Mananga, Barangay Tabunok, dakbayan sa Talisay.

Ang suspetsado giila sa mga polis nga si Dante Racaza, hingkod ang panuigon, ulitawo, nagpuyo sa maong lugar, nagtingkagol karon diha sa Talisay city police detention cell.

Si Racaza nasakmitan sa mga polis og mga shabu paraphernalia sa maong pagpangronda.

Si Racaza mibutyag ngadto ni SPO3 Danilo Gimeno, polis sa Talisay nga diha siya sa ilang tindahan nag-estambay kauban sa iyang mga higala.

Apan pag-abot sa mga polis nga mipahigayon sa ronda mialibwag og panagan ang mga kauban ni Racaza.

Si Gimeno mibutyag kagahapon sa Banat News nga si Racaza ug ang kapuyo niining si Jesica Bajeno nasikop na nila tungod sa pagpamaligya niini og marijuana sa milabay''ng tuig.

Si Racaza nakagawas dayon tungod kay gipiyansahan man sa iyang inahan apan si Bajeno nagtingkagol pa hangtud karon diha sa Talisay city jail sa Maghaway.