Kini tungod kay hapit na mahingpit nga ordinansa ang amendatory ordinance sa siyudad nga magpakunhod sa market value sa agricultural land gikan sa 8.5 porsiyento ngadto sa 4.5 porsiyento.
Sa public hearing nga gipahigayon atol sa sesyon sa city council kagahapong adlawa way bisan usa nga nangahas pagsupak sa nahisgotang ordinansahon.
Gani gihangop sa mga opisyales sa mga bukirang barangay nga nanambong sa public hearing ang nahisgotang ordinansahon nga gipalabang ni konsehal Jocelyn Pesquera.
Tumong sa konsehal pag-amendar sa real property tax ordinance sa siyudad mao ang paghatag og konsuwelo sa mga molupyo sa bukirang mga barangay nga maglisod pagbayad sa taas nga buluhisan nga gipatuman sa dakbayan.
Kini human usab mangreklamo ang mga agricultural landowner nga dili na makatuman sa ilang obligasyon taliwala sa ilang kaandam pagbayad sa buluhisan tungod sa taas nga tax rate.
Nasayran nga ang reklamo sa mga nanag-iya og luna sa kabukiran nakakuha og simpatiya ni Mayor Tomas Osmeña.
Alang sa mayor dili mahimong ikuridas ang pagpahamtang sa real property tax tungod kay managlahi ang kahimtang sa panginabuhi sa mga molupyo sa bukirang barangay ug sa nanimuyo sa mga urban barangay sa dakbayan.
Sa sunod semana nga regular session sa city council posibleng matigayon na ang final deliberation sa nahisgotang ordinansahon alang sa hingpit nga pag-aprobar niini sa mga sakop sa konseho.