Demolisyon atol sa piniliay

Namilegrong ma-demolish ang gibanabanang 30 ka mga panimalay diha sa Lower Tayong, Banilad ning dakbayan sa Sugbu atol sa adlaw sa eleksiyon karung Lunes.

Kini human mipahibalo na ang tag-iya sa maong pribadong luna nga si Vicente Leyson ngadto sa Lower Tayong Homeowners Neighborhood Association nga ipatuman nila ang demolisyon karong Lunes human usab kanunay''ng nagmagahi ang mga pamilyang nagpuyo sa maong lugar pagbiya sa maong pribadong luna nga ilang gi-okupahan.

Sayo niini, ang pamilyang Leyson midangop na sa korte aron pugson pagpapahawa ang nahisgutang mga pamilya sa ilang luna nga gipuy-an niini sulod sa dugay nang mga katuigan.

Tungod niini, posibling mo- boycott ug dili mobotar ang mga apektadong pamilya atol sa eleksiyon karong Lunes tungod kay bantayan nila ang pagpangabot sa mga sakop sa demolition team nga moguba unya sa ilang mga panimalay.

Hinuon midangop na ngadto kang Mayor Tomas Osmeña ang nahisgutang mga pamilya aron hangyuon ang mayor nga i-angan-angan lang una ang pagpatuman sa demolisyon.

Gipasalig hinoon sa mayor nga maoy mohangyo ngadto sa pamilyang Leyson.