Mga kandidato gipa-DQ dili iproklamar – Comelec

Mipasidaan ang Commission on Elections (Comelec) nga ang mga kandidatong mananaog karong Lunes, Mayo 14, 2007 nga nag-atubang og kasong "disqualification" dili iproklamar hangtod nga mamatud-an nga dili siya angayang idiskwalipikar.

Matud pa ni Provincial Election Supervisor Leonil Marco Castillano nga kinahanglan husayon usa sa Comelec en banc o kaha sa Korte Suprema ang maong kaso una himoa ang proklamasyon niadtong mananaog sa election.

Gipahayag kini ni Castillano samtang gibutyag niya nga hangtod karon mikabat nag 22 ka mga kandidato sa lalawigan ang nag-atubang og disqualification case.

Ang kasong ingon niini motumaw kon ang usa ka politiko nakakitag kalapasan batok sa "election code", ang kaatbang biyang kandidato.

Apan gumikan kay dili daghan ang buhatan sa gobyernong makahusay ning maong matang sa kaso, dili gyud madali ang paghatag og husay niini.

Apan hinuon miingon si Castillano nga dili makatandog sa kandidatura sa usa ka tawo ang kiha nga iyang giatubang.

Anha lamang masabod ang usa ka mananaog nga kandidato human sa election kay dili man siya makalingkod dayon sa iyang posisyon gawas kon mahusay na ang iyang kasong giatubang.

Kun modaog siya sa iyang kaso, makapadayon siya pagtuman sa iyang katungdanan, apan kon mapildi, mahonong gyud siya sa pangatungdanan.

Apan matud pa ni Castillano nga kasagaran ning mga kaso nga may labot sa election dugay kaayong magdaog tungod kay duha lamang ka division sa Comelec sa tibuok nasud ang makahusay niini.

Gawas pa, unsay desisyon sa Comelec mahimo pang ikaapelar ngadto sa taas nga hukmanan, matud pa ni Castillano.