Katawhan sa Consolacion kanunay magbantay – Alegado

Giawhag ni Mayoralty aspirant Teresa Alegado sa lungsod sa Consolacion ang katawhan nga magpabilin sa ilang makanunayon nga pagbantay ilabi na gayud sa posible nga himuon nga pagpanikas sa umaabot nga piniliay.

Si Alegado miingon nga kinahanglan na gayud karon nga manginlabot ang katawhan sa lungsod pagseguro nga dili gayud magmalampuson kadtong mga tawo nga gusto modaog pinaagi sa tikas.

Nagkanayon si Alegado nga kun ang katawhan dili magpakabana karong umaabot nga piniliay sila mao ra usab ang mag-antos sa mosunod nga mga tuig.

Gipasabot ni Alegado nga ang paglambo sa usa ka lugar nagkinahanglan kini sa tabang sa tanang katawhan.

Mao usab kini ang gilauman ni Alegado nga mahitabo kun ang katawhan mopakita gayud sa ilang pagpakabana.

Nanawagan usab si Alegado sa pribadong sektor ug mga molupyo sa lungsod nga nagpakahilom lamang sa mga isyu nga giatubang karon sa namunuan.

Gitataw ni Alegado nga mao na kini ang hustong panahon nga kinahanglan gayud ang ilang pagpanginlabot.

Subay niini nanawagan usab si Alegado sa kapolisan nga susihon ang giingong presensya sa armadong mga tawo diha sa maong lungsod.

Laing gusto niya mahibaw-an unsay tumong niadtong helicopter nga mitugpa sa lungsod ug gisugat sa sakyanan sa munisipyo sa miaging Mayo 4.