SPO1 Ocampo kulatado sud sa prisohan

Si SPO1 Marcial Ocampo kinsa nakonbikto tungod sa pagpatay ni kanhi Cebu City Market Administrator ug Bantay Dagat Director Epidio "Jojo" dela Victoria Jr. gikatahong gimaltrato diha sulod sa Talisay City Jail sa Maghaway.

Apan ang maong taho gihimakak ni jail warden Johnson Calub.

Si Calub nagkanayon nga imposible ang maong taho nga adunay mahitabong pagmaltrato sa mga piniriso nga dili nila mahibaw-an tungod kay permamenteng abli ang bintana sa mga cottages sa prisohan diin nahimutang ang mga piniriso.

Gikataho nga si Ocampo kinsa naghuwat sa tubag sa giduso niyang motion for reconsideration kabahin sa iyang pagkakonbikto gikulata ug gibitay sa iyang mga kaubang priso.

Gibutyag ni Calub nga "round-the-clock" o sa kanunay''ng higayon ang ilang pagpahigayon og pagbantay sa mga piniriso ug imposible nga dili sila makahibalo kun unsa nay nahitabo sa sulod sa prisohan.

Ang warden mitataw nga aduna silay higpit nga palisiya nga gipatuman sa ilang mga piniriso ug si Ocampo usa sa girespetohan sa iyang mga kauban nga priso tungod sa gipakita niining maayong batasan ngadto sa ubang mga priso.