300 ka balay ugdaw sa Ermita

Kahuot sa agianan tungod sa mga nag-overnight parking, walay functional nga fire hydrant ug ginama sa kahoy nga mga balay maoy nasugatang problema sa kabomberuhan atol sa pagresponde sa sunog nga milamoy sa gibana-banang 300 ka mga balay diha sa sitio Bato Ermita nga gibana-banang midanyos og P2.2 milyones

Si Supt. Ismael Codilla, ang city fire marshal sa pakighinabi sa Banat News mitug-an nga sa pag-abot nila kagahapon sa lugar naglisod og plastada ang mga fire truck tungod sa mga gi-parking mga sakyanan.

Nadungagan pa kini sa nagpunsisok nga mga tawong nagkara-kara og hakot sa ilang kabtangan, samtang midugang si Codilla nga gikatahong ang mga valve sa fire hydrant nga duol gipanggabas ug gipatimbang sa mga junkshop hinungdan nga adto na sa fire hydrant sa dalan F.Gonzales mikuha og dugang tubig ang mga fire trucks.

Ang sunog nagsugod diha sa panimalay ni Liberacion Torefeil sumala pang SFO1 Bernardito Baruel sa BFP-investigation section, apan hangtud karon wala pa matino kung unsa gyud ang hinungdan.

Apan sa mga nanggawas nga report nagsugod kini sa nasunog nga electric fan ug buot pa kining sutaon sa kabomberuhan.

Giisa ni Codilla ang alarma ngadto sa general alarm tungod sa kalisod sa suplay sa tubig diha sa duol, sagad sa mga balay ginama sa kahoy ug gamay kaayo ang agianan.

"Lisod ang dalan, during the early stages sa pagresponde nato didto naa gyuy mga nag-ali nga mga sakyanan, half of the road nagamit sa mga tawo ug mga gi-parked nga sakyanan," asoy pang Codilla.

Ang sunog milamoy usab sa pipila ka mga tangkal lakip na sa mga sulod niining mga baboy, kanding ug uban pang mga hayop nga igbabaligyaay sa Carbon Market.

Samtang pipila ka mga sibilyan ang nangasamdan sa insidente tungod sa pagdali-dali sa pagluwas sa ilang kabtangan apan wala hinuon sila magpatala sa kabomberuhan.

Duna say nahitabong komosyon sa dapit dihang nagkagubot tali sa tag-iya sa tagbalay nga giingong diin magsugod ang sunog batok sa ilang mga silingan tungod kay sila maoy gibasol sa hitabo.

Ang maong sunog nakontrolar human sa usa ka oras ug 25 minutos apan hingpit nga napawong pagka-alas 7:27 na sa buntag.

Ang mga biktima sa sunog temporaryong gibutang sa sports complex sa maong barangay samtang ang dakbayan mipadala na og pasiunang hinabang sa mga nasunugan.