Walay lisensya ang mga armas sa bodyguard ni Mayor Mancio

Dili lisensyado ang mga armas sa lima ka mga tawo nga gidudahang mga goons sa usa ka politiko sa lungsod sa Madredijos nga nadakpan niadtong milabay''ng semana sa checkpoint sa mga sakop sa Regional Mobile Group (RMG).

Ang iyang mga kaatbang buot nga ipa-disqualify siya sa iyang pagkandidato tungod sa maong mga kalapasan ug pagmentinar og mga armadong tawo nga gihulagway nilang pagsupak sa lagda sa Comelec.

Si Sr. Supt Carmelo Valmoria, direktor sa kapolisan sa probinsya sa Sugbu mitug-an sa mga tigbalita base sa gihimong pakisusi sa Firearms and Explosive Security Agency Guards Supervisory Section didto sa ulohang buhatan pinaagi ni Supt. Rey Lyndon Lawas, nasuta nga ang tulo ka mga armas nga nasakmit sa close-in bodyguards ni Mancio wala gyud matala sa records.

Ang mga armas nga nasakmit naglangkob sa usa ka .30 caliber US Carbine Rifle nga may magazine ug kinse ka mga buhing bala, usa ka .22 caliber magnum Black Widow nga may lima ka buhing bala, usa ka 9mm caliber pistol ug dunay tulo ka magazine , 57 ka buhing bala sa 9mm ug mga bala sa kalibre 45.

Ang lima ka mga dinakpan mao sila si Rolando Dungan Dacutan, 48, taga Pagsabungan Mandaue, kinsa maoy nagmaneho sa sakyanan nga Toyota Wagon nga gipanag-iya sa usa ka Sheley Regis, trabahante sa opisina ni mayor Letty Mancio, Cesar Yabaquin, 33, residente sa Tarong Madredijos, Wilfredo Bacus Bacalso, taga Cubacod Mandaue, Romeo Santillan, 40, ug Allan Doble Mancio, 32 pulos molupyo sa Mlabago sa maong lungsod.

Ila usab nga nasuta ni Valmoria nga ang usa ka pistola nga naapil pagkasakmit gipanag-iya ni Rufino Azucena Mancio ug gani ni-expired na ang lisensya niadtong Marso 24, 2007.

Sa pagka karun gitun-an pa sa kapolisan labot sa tag-iya sa maong armas labot sa kasong criminal liability.

Kun kahinumduman human madakpi ang mga gidudahang goons ni Mayor Letty Mancio iyang giangkon nga dili niya mga goons ang mga dinakpan kun dili close in body guards niya sukad pa niadtong milabay''ng piniliay sa 2004.

Apil sa pangangkon ni Mancio nga legal ang maong mga armas nga nasakmit sa taga RMG ug nipasalig nga buhaton nila ang tanan kutob sa mahimo nga ilang tabangan nga makagawas ang lima niya ka mga sakop.