Magic ink gamiton sa GO sa negative vote buying

Nabalaka karon si Bise Mayor Michael Rama nga molusad og negative vote buying ang ilang kaatbang sa politika atol sa umaabot nga eleksyon karong Lunes.

Kini human makita sa bise mayor ang magic ink nga gidala sa iyang dumadapig nga susama og indelible ink ang resulta.

Nagduda si Rama nga gikan sa ilang kaatbang sa politika ang nahisgutang magic ink ug gamiton kini sa pagpamalit unya og mga boto.

Gipasabot sa bise mayor nga mahimong hayluhon og salapi ang ilang mga dumadapig ug dili na pabutaron atol sa eleksyon ug butangan ang tudlo niini sa magic ink aron pagseguro nga dili na kini makaboto.

Bugtong panawagan ni Rama sa ilang mga tigpaluyo nga dili mobaligya sa ilang boto aron dili molampos ang bisan unsang plano sa ilang kaatbang pagpanikas sa umaabot nga eleksyon.

Sa pikas bahin, susama usab niini ang panawagan ni Cebu City Election Officer Marchel Sarno.

Matud ni Sarno nga posibleng gamiton ang magic ink sa pagpanikas pinaagi sa negative vote buying human makita niini ang nahisgutang liquid chemical.

Subay niini, gipahinumduman ni Sarno ang mga botante nga dili lang ang katungod niini pagpili og kandidato maoy gibaligya lakip na ang ilang dignidad kun kini magpahaylo og salapi.

Wala hinuon hatagi og gibug-aton ni Mayor Tomas Osmeña ang gikabalak-an sa bise mayor nga pagpanikas.

Gani nagtuo ang mayor nga way madag-an nga presinto ang ilang kaatbang sa politika atol sa piniliay karong Lunes.

Gikuhaan sa Banat News og reaksyon ang habig sa Genuine Opposition sa syudad sa Sugbu apan ang chairman niini nga si congressional aspirant Jonathan Guardo dili motubag sa iyang mobile phone.