Gwen pormal nang mikiha ni Santiago

Pormal nga gisang-at ni Gobernador Gwendolyn Garcia sa buhatan sa Visayas-Ombudsman ang kasong kriminal ug administratiba batok kang acting Ombudsman for the Visayas director Virginia Palanca-Santigao labot sa mga malisyoso niining pamahayag may kalambigitan sa gobernador sa isyu sa Cebu International Convention Center (CICC).

Sa unom ka pahinang reklamo ni Garcia batok kang Santiago giawhag niini si Ombudsman Mercedetas Guttierez nga pagpa-inhibit ni Santigao sa paghupot sa kaso sa CICC sa ingon dili niini ma-impluwensyahan ang imbestigasyon.

Giduso usab sa gobernador ang paghangyo ngadto kang Guttierez nga motudlo kini laing señor graft investigator nga taga Luzon ug dili usa ka Sugbuanon sa ingon dili usab kini ma-impluwensyahan sa political pressure.

Sa affidavit sa gobernador gisentro niini ang Republic Act No. 3019 (Anti-Graft and Corrupt Practices Act) Section 3(e) nga giingon nalapas ni Santiago.

Samtang sa section 3(k) nagbutyag nga "divulving or releasing information of a confidential character in advances of its authorized date" nahimo ni Santiago.

Nakita sa gobernador nga sa lakang nga gihimo karon nasusama na daan siyang gihusgahan nga sad-an sa gi-akusar ni Crisologo Saavedra kinsa mipasangil kaniya ug sa mga opisyal sa Kapitolyo sa overpricing sa CICC.

Matud pa sa gobernador usa ka dakong sayop ang nahimo ni Santigao human kini mipadayag nga nakabantay na hinoon sila hinungdan nga mihimo sila''g mga maayong lakang sa pag-imbestigar sa gobernador ug uban pang opisyal sa Kapitolyo.

Kini tungod kay matud pa sa gobernador hangtod ning ilang pagduso og kasong kriminal ug administratiba kang Santiago wala man gyoy komunikasyon ang Ombudsman diha sa iyang buhatan.

Giklaro sa gobernador nga wala gyud siya magtagotago sa dokumento sa pagtukod sa CICC apan si Santigao ug ang iyang kritiko mihukom na niya ug sa ubang opisyal nga sad-an hinungdan nga angayan lang nga dili na kini pahupton sa pag-imbestigar sa isyu sa CICC.

Si Santiago sa dihang gitawagan sa Banat News nagdumili sa pagkomentaryo.