20-anyos gipusil sa Tau namatay

Patay ang usa ka 20 anyos nga lalaki human pusila sa grupo sa Tau Gamma Phi duol sa diskohan sa miaging kaadlawon diha sa Magay, Compostela, Sugbu.

Apan duha sa tulo ka mga suspek nangadakpan human sa gipahigayong hot pursuit operation sa kapolisan sa Compostela.

Ang biktima giila sa kapolisan nga si Romnick Monterde, residente sa Sitio Anahaw sa sama nga barangay

Siya nakabaton og samad pinusilan sa ibabaw''ng bahin sa dapidapi agi sa wala matinong kalibre sa armas nga maoy gigamit sa pagpamusil sa grupo sa Tau Gamma.

Ang gitumbok nga mipusil sa biktima mao si Gerome Alerpa alyas "Negro" nga taga Poblacion, Danao.

Samtang ang nangadakpan sa grupo ni SPO3 Tirso Lima mao sila si Carlito Aguilar, 22, taga Tabok, Danao ug Van Arvin Mara Durano, 22, residente sa Sabang sa maong siyudad.

Si PO2 Pedro Borinaga mitug-an sa Banat News nga nagkabikil ang biktima ug si Navales sulod sa diskohan tungod kay usa kanila ang naigo sa siko samtang nagsayaw nga misangko hinuon sa pagsinukmagay.

Nagkanayon si Borinaga nga miulang ang ig-agaw sa biktima kinsa miyembro usab sa Tau Gamma Phi.

Sa dihang mipauli na ang biktima pasado alas 2 sa kaadlawon pipila lang ka metros ang gilay-on gawas sa diskohan kalit lang gipusil ang biktima ni Alerpa.

Daling gidala sa Danao District Hospital si Monterde ug gibalhin usab dayon sa Vicente Sotto Memorial Medical Center apan gideklarar sa mga doktor nga patay nang daan nga nahiabot.

Niingon si Borinaga nga ilang himuon nga state witness sila si Navalez ug Durano kay ilang namatud-an nga walay labot sa krimen samtang si Alerpa padayon pang nagtago-tago human makaikyas sa miresponding kapolisan.