1 ra ang positibo sa drug test sa CCPO

Sa 93 ka mga polis sa Cebu City Police Office (CCPO), lima niini mga opisyal, sa gipahigayong drug test sa PNP Crime Laboratory niadtong miaging semana, usa kanila ang positibo sa presensya sa methamphetamine hydrochloride.

Si Acting Cebu City Police Office Director Sr. Supt. Patrocinio Comendador mipakita sa resulta sa drug test diin usa ka polis nga nadestino sa Pardo Police Station positibo sa paggamit og ginadiling drugas.

Ang drug test gihimo human mipatawag og command conference si Comendador ngadto sa tanang sakop sa miscellaneous teams ug ang special unit sa 11 ka police station sa dakbayan sa Sugbu.

Si Comendador nadismaya human upat sa iyang mga sakop ang nalambigit sa binuang, duha niini nadakpan sa PDEA-7 samtang ang duha nadakpan usab sa entrapment operation sa National Bureau of Investigation (NBI).

Matud ni Comendador sa resulta sa drug test nga dunay positibo sa paggamit niini mopahigayon siya og dinaliang pre-charge investigation batok sa maong polis.

Sumala pang Comendador nga usa ka grave offense ang gihimo sa maong polis ug kini iyang iduso ang ngalan ngadto sa Regional Intelligence and Detective Management.

Hinuon giklaro ni Comendador nga magpabilin ang maong polis sa iyang nadestinohan karon samtang iyang paabuton ang resulta sa imbestigasyon.

Samtang sa laing bahin, si PO2 Manolito Anore ug PO1 Joseph Dagatan nga nag-escort sa usa ka druglord gikan sa San Fernando paingon sa dakbayan sa Sugbu positibo usab sa resulta sa drugtest human gipailawom si Anore sa drug test.

Si Anore nadakpan sa PDEA-7 niadtong milabay''ng semana.

Midugang si Comendador ang resulta sa drug test sa duha makig-alayon siya sa Philippine Drug Enforcement Agency aron mapasakaan usab og kasong administratiba silang Anore ug Dagatan.