Power Team 4 ni Jonkie mangharos

Mangharos sa ilang kadaugan sa Mayo 14 nga piniliay ang Power Team 4 nga gipangulohan ni mayoralty candidate Thadeo Jovito Jonkie Ouano batok sa mga oposisyon niining kaatbang.

Si Antero "Jun" Caña, tigpamaba sa Power Team 4 maoy mipadayag

nga ang konkreto nga plataporma de gobyerno maoy nag-unang gitan-aw sa mga Mandauehanon nga gitumong alang sa pagpadayon sa naangkon nga kalambuan sa dakbayan.

Si Caña miingon nga sa tanan nga mga kandidato alang sa pagka-mayor sa piniliay karong Mayo 14, si Jonkie lamang ang nakahan-ay og konkretong plataporma de goberno.

Giklaro niya nga si mayoralty aspirant Jonas Cortes may mga gihan-ay usab nga plata porma de goberno nga naglakip sa backyard gardening nga dili mohaum sa dakbayan nga usa ka highly urbanized city.

Sa forum nga gipasiugdahan sa C-CIMPEL sa miaging semana, si Jonkie lamang ang maisip nga adunay gikapasabot nga plataporma de gobyerno.

Matud pa ni Caña nga ubos sa maong plataporma de gobyerno ni Jonkie gitinguha niini ang pagpakaylap sa kalambuan ngadto sa kabarangayan nga makahatag og kahamugaway sa pagkabutang sa katawhan.

Naglakip niini ang paghatag og unang pagtagad sa kadalanan sa kabarangayan, mga suga, kanal alang sa pagkabig sa dugang kapitalista nga mobutang sa ilang negosyo sa dakbayan.

Gitinguha usab ni Jonkie ang pagpalambo sa programa sa panglawas, pagpadayon sa programa sa edukasyon sa mga kabus nga kabataan ug ingon man ang pagpalambo pa sa housing program sa kabus nga lumolupyo sa dakbayan.