Taxi driver gigapos sa tulisan

Usa ka taxi driver gigapos human tulisa sa iyang mga pasahero diin usa kanila babaye ug gibiyaan sa reclamation area sa Subangdaku, dakbayan sa Mandaue.

Ang biktima mao si Miguelito Flores, 26 anyos, ulitawo nga taga Vallehermoso, Negros Occidental ug driver sa Worldwide taxi nga nagdala sa plate number WGN 926.

Si PO2 Ricardo Mejia sa Presinto 2 sa Subangdaku Police Station miingon nga nakuhaan sa tibuok adlaw nga kinitaang P2000 ang biktima.

Ang biktima mitug-an nga misakay kaniya diha sa Taboan, dakbayan sa Sugbu ang tulo ka pasahero ug nagpahatod sa may Cebu International Convention Center sa dakbayan sa Mandaue.

Apan paghidangat sa maong dapit kalit lang siyang gitionan og armas sa duha ka lalaki nga naglingkod sa luyong bahin nga lingkoranan ug mideklarar og tulis.

Ang babaye nga naglingkod sa iyang tupad maoy nikuha sa kuwarta sa iyang pitaka ug pagkahuman gigapos ang iyang mga kamot og pisi ug daling nangikyas.

Ang mga motoristang nakaagi sa lugar diin giparking ang taxi nga nagdudang dunay dautang nahitabo sa drayber mao nay miadto sa ilang buhatan.

Ang mga polis daling misusi sa dapit ug ilang naabtan ang biktima nga ginapos ug sila na maoy mibadbad sa hikot niini.