Kawani sa Speed namaligya''g scrap girekomendar i-taktak

Giaprobahan na sa buhatan sa City Attorney’s Office ang rekomendasyon alang sa pagpataktak sa katungdanan sa kawani sa Squatters Prevention Encroachment and Elimination Division (SPEED) nga nasakpang mipatimbang sa mga scrap materials ug sa mga karaang medical equipment sa kagamhanan sa siyudad sa Sugbu sa ilegal nga paagi.

Gibutyag ni acting City Attorney Rodulfo Golez nga iya nang giaprobahan ang rekomendasyon ni assistant City Attorney Joseph Bernaldez aron mataktak sa katungdanan si Enriquita Crispe.

Si Bernaldez mao kiniy chairman sa Employees Management Committee on Inquiry (EMCOI) nga maoy gitahasan pag-imbistigar niadtong mga kawani nga mag-atubang og mga reklamo.

Apan ang maong termination order gitakda pang iduso ug pa-aprobahan ngadto sa buhatan ni Mayor Tomas Osmeña alang sa hingpit nga pagpatuman niini.

Nasayran nga si Crispe nipatimbang ug nibaligya sa mga scrap iron ug mga karaang medical equipment sa siyudad nga gibutang sa bodega sa SPEED ngadto sa usa ka Pardillo Junkshop.

Si Osmeña una nang mimando og imbestigasyon sa maong kontrobersya ug apil na ang pagpasira sa operasyon sa maong junkshop nga nipalit sa mga gibaligya nga kinawat nga butang ni Crispe sa siyudad nga wala masubay sa hustong proseso.