Agri-lot sa Bonbon ibalik ang presyo

Gitakdang aksyonan sa konseho sa dakbayan sa Sugbu sa sesyon niini karong sunod semana ang hangyo sa konseho sa bukirang barangay sa Bon-bon pinangulohan ni Kapitan Emiliano Cabriana nga nag-awhag nga ibalik sa orihinal nga presyo ang gipatas-an nga fare market value kun presyo sa mga agricultural land sa ilang lugar.

Si Bise Mayor Michael Rama presiding officer sa konseho daling mikarga sa agenda sa maong isyu aron masulbad dayon ang maong problema sa labing daling panahon.

Kini human mipasalig si Mayor Tomas Osmeña nga iyang hangyu-on ang konseho nga irekonsiderar kun bakwion ang naaprobahan niining ordinansa nga nagpataas sa fare market value sa agricultural land sa maong barangay gikan sa P22 matag metro kwadrado gihimo kini karong P70.

Ang mga molupyo sa maong barangay mitiyabaw sa gihulagway nila nga grabeng kamahal sa mabayran nilang buhis gumikan sa pagpatuman sa maong na-aprobahang ordinansa niadtong milabay''ng tuig.