Ex-convict gipatay sa Carreta

Usa ka ex-convict gipusil patay sa nag-inusarang lalaking luwan og motorsiklo ug nagsuot og helmet samtang naglingkod uban sa iyang igsuon ug mga silingan diha daplin sa dalan sa Gen.Maxilom Extension, Carreta kagahapon sa hapon.

Ang namatay giilang si Roland Milagrosa,39, minyo ug residente sa Ponce Compound sa maong barangay kinsa niadto pang Nobiyembre sa milabay''ng tuig nakagawas gikan sa Bagong Buhay Rehabilitation Center.

Sa imbestigasyon ni SPO3 Alex Dacua base sa pamahayag sa igsuon sa biktimang si Norberto, 59, silang duha sa iyang igsuon ug mga silingan naglingkod kalit nga may usa ka motorsiklong kolor pula ang mihunong diha sa ilang atubangan.

Ang suspek nag-inusara lang nga nagsuot og helmet miduol kanila ug kalit lang nga midul-it og pusil sa ulo sa iyang igsuon tumong sa tuong tampihak sa ulo ug ang bala milapos diha sa walang bahin.

Tungod sa kakalit sa hitabo nagkatibulaag sila og panagan aron pagtago ug ang suspek yanong mibalik sa iyang gi-parking nga motorsiklo ug daling miikyas padulong sa direksyon sa pantalan.

Ang mga sakop sa Mobile Patrol Group car 515 nga daling miresponde sa lugar mao nay midala kaniya ngadto sa Cebu City Medical Center apan gideklarar siya sa mga doktor nga dead on arrival.

Ang mga sakop sa Scene of the Crime Operation –7 nakarekober og usa ka basiyo sa kalibre 45 nga bala diha sa crime scene.

Wala pa usab matino sa kapolisan kung unsay motibo sa pagpamusil. Kahinumduman sa nakalabay''ng duha ka tuig dunay mga ex-convict nga gipamatay sa gidudahang mga sakop sa vigilante diin gibana-banang miabot na ngadto sa 170 ka mga tawo ang gitumba.

Apan ang kapolisan wala pa mokumpirmar kung usa ba kini sa mga binuhatan sa maong grupo sanglit layo ra kaayo ang estilo sa pagpatay.

Si JO1 Catherine Cintos sa Bagong Buhay Rehabilitation Center mitug-an sa Banat News nga dunay nasulod sa ilang bilanggoan nga susama og pangalan ug napriso na makaduha tungod sa kaso sa ilegal nga drogas, nakagawas lang kini niadtong Septembre sa tuig 2001.