Una niini nianang pagkabuntag kagahapong adlawa patay ang usa ka helper sa 10 wheeler Izusu cargo truck nga gikargahan og 500 ka mga sakop sa semento human nahulog sa karsada diha sa Sitio Matin-aw Laaw, Borbon.
Si Federico Notivo alyas Dikoy nga lumad nga taga Sitio Tanjay Pamplona Negros, Oriental namatay human kini mahulog dungan sa mga sinakong semento.
Samtang ang iyang duha ka kauban nga sila Virgilio Padin Momongan, 18, nga taga Ocaña, Carcar ug Efril Ballestin Mendez, 19, nga taga Ubay, Bohol naangol human usab sila maapil sa pagkahagbong sa sinakong semento nga ilang gilingkuran niadtong higayona.
Gikataho nga ang drayber sa maong cargo truck nga si Arsenio Espraquiza Alvarado, 26, nga taga Sabang, Sibonga, Cebu mopadulong na unta kini sa lungsod sa Medellin gikan dinhi sa dakbayan sa Sugbu apan pag-abot sa nahisgutang lugar nangatagak ang mga sinakong semento hinungdan nga nangaapil sa pagkahagbong ang tulo ka helper ug miresulta sa kamatayon ni Dikoy.
Ang mga biktima daling gidala sa Juan Dosado Memorial Hospital sa Sogod samtang ang namatay gidala usab dinhi sa usa ka tambalanan sa dakbayan.
Samtang sa pagka-ala una kapin sa hapon lain na usab nga aksidente nahitabo sa Sibonga diin usa ang patay ug upat ang naangol sa dihang usa ka Ceres bus (FWG 876) nga gimaneho ni Noe Robles Esmino, 42, minyo nga taga Hinigaran Negros Oriental misaghid sa usa ka traysikol (GY-3248) nga gimaneho ni Vicente Manulang Gevana, 43, residente sa Sabang, Sibonga kang kansang lisensiya na-expire na.
Ang namatay nga pasahero sa tricycle giila nga si Alice Villamor hingkod ang panuigon nga taga Sitio Dumlog, Simala lungsod sa Sibonga samtang ang mga nangaangol mao sila si Violeta Billiones, Melanie Tiro, Evangeline Cenas nga nagpuyo ra usab sa nahisgutang lungsod.