Kap wa mahulga sa kiha

Wala mahulga si Kapitan Joel Garganera sa Tinago niining pagsumbalik sa pagpasaka og kaso sa kagamhanan sa siyudad sa Sugbu ngadto kaniya nga nangayo og P20 milyones nga danyos tungod sa gihimong pagpasaka niini og kaso sa siyudad aron kapugngan ang pagbaligya og pagpaabang sa South Reclamation Project (SRP).

Gibutyag ni Garganera nga andam niyang isugal ang iyang kinabuhi aron pamatud-an ang kaseryoso sa iyang gipasaka nga kasong ''civil'' sa korte.

Ang dakbayan misang-at sa maong sumbalik nga kaso kang Garganera tungod sa negatibong epekto ngadto sa mga langyaw''ng negosyante nga gustong mobubo og puhonan sa SRP ug aron pagseguro nga wala nay susama kang Garganera nga mosang-at og susamang kaso nga makapasamot og kalangay sa pag-develop sa maong proyekto.

Si Garganera misang-at og kaso sa korte niadtong Marso 26 nga nag-awhag nga pugngan si Mayor Tomas Osmeña, mga sakop sa konseho ug ang Cebu Investment Promotion Center (CIPC) sa pagbaligya ug pagpaabang sa mga luna diha sa SRP.

Pabiling gibarugan ni Garganera nga dili pa mahimong makabaligya ug makapaabang ang dakbayan sa luna sa SRP tungod kay wala pa kini congressional authority.

Kini tungod kay daan na niya kining napanglantawan ilabi na kay sakit ang mga komentaryo sa mga tinuod nga isyu.

Matud ni Garganera, ang mga Sugbuanon maoy nag-antos karon og maayo sa dakong utang sa siyudad nga tag P1.7 milyones ang adlaw hangtod sa pagka-impas niini unya sa tuig 2025 tungod sa dakong utang nga gi-loan sa siyudad sa Japan Bankers for International Cooperation nga maoy gigasto pagpatukod sa maong proyekto. — Darrel A. Carumba