‘Hired goon’ ni Hiram nasikop

Usa ka niangkon nga "hired goon" ni kanhi Cebu City Police Office director, Ret. Col. Hiram Benatiro nga gikan sa Davao del Norte ang nasikop niadtong Martes sa gabii sa barangay Tapilon, lungsod sa Daanbantayan.

Ang nasikop nailhan nga si Jaime Labawan, 30 anyos, minyo, nga taga sityo Magintalonan, barangay New Visayas, lungsod sa Santo Tomas, lalawigan sa Davao del Norte.

Si Labawan miingon nga nagtoo siya nga iyang mga kauban ang pondok sa mga tawo sa panimaye ni barangay kapitan Corseno Rosas sa barangay Tapilon.

Namatikdan nga armado og .38 kalibre nga armas si Labawan hinungdan nga gidakop kini ni Rosas ug gitugyan sa ningrespondeng kapolisan nga gipanguluhan ni SPO1 Jose Dupay.

Si Labawan nga nahinabi sa Bantay Radyo miasoy nga niadtong Abril 19, usa ka Omar (Muslim) ang nikuha kaniya sa ilang lugar aron suhulan og P300 ang adlaw sa pagpamutang sa mga campaign posters ni Benatiro kinsa ningkandidato sa pagka-konsehal sa lungsod sa Daanbantayan.

Matud pa ni Labawan wala siya kapananghid sa iyang pamilya sanglit dinalian ang pagkuha kaniya ug sa samang adlaw nibiyahe dayun sila kauban sa laing upat niya ka silingan nga iyang nailhan nga sila si Junie Mamboo, Dondon, Amay ug Rey ug laing 14 pa nila ka kauban padulong sa Cagayan de Oro.

Petsa 20 na sa gabii sila nahidangat sa barangay Tapilon ug gipapuyo silang tanan sa panimaye nga bakante nga giingong iya ni Benatiro ug gibauran nga matag gabii lang sila manggawas.

Matud pa ni Labawan nga daku nalang niyang katingala nga napulo kanila ang gipagunit og armas ug naghuna-huna unta siya sa pagpauli balik sa Davao apan wala siyay kwarta.

Si Labawan niasoy nga gibaharan sila ni Omar nga patyon kon may usa kanila nga madakpan.

Magpuli-puli sila pagdala sa armas depende sa pagawason matag gabii nga mobantay sa mga rally sa grupo ni Benatiro kinsa ang ilang kandidato pagka-mayor mao si Augusto Corro sumala pa ni Labawan.

Apan matud pa ni Labawan nga wala siya kaila ni Corro ug ang iyang nailhan mao lang sila si Benatiro ug si Dr. Jose de Leon, Jr. nga kandidato sa pagkabise-mayor sanglit nakaadto siya sa balay niini apan wala siya kaadto sa balay ni Corro.

Si Labawan nga nahinabi sa Bantay Radyo samtang diha na sa buhatan sa kapolisan nipadayag nga nameligro na ang iyang kinabuhi sa pagkakaron.

Si Labawan nga usa ka Ata (native) sa Davao del Norte nakahuman lang siya sa elementarya ug suhol-suhulan lang siya og inadlaw nga trabaho sa ilang lugar isip iyang panginabuhi ug wala siyay dautang rekord.

Giklaro ni Labawan nga dihang gihatagan na sila og armas, una pa siya kamatikod nga dautan ang ipatrabaho kanila.

Si Labawan nag-atubang na og kasong kalapasan sa Comelec gun ban ug illegal possession of firearms ug kasamtangang nagtingkagol sa selda sa kapolisan sa lungsod sa Daanbantayan.