Mayor sa D’bantayan, bana gikiha’g ‘bigamy’

Si incumbent mayor Maria Luisa Loot sa Daanbantayan ug ang bana niining si Sr. Supt. Vicente Loot gipasakaan og kasong "bigamy".

Ang nahisgutang reklamo batok sa magtiayong Loot giduso ni Renerio Arrogante III diha sa Provincial Prosecutors Office niadtong Abril 18.

Si Arrogante sa iyang giluwatang reklamo nagkanayon nga ang incumbent mayor nagpakasal sa civil ni Rolando Nicandro niadtong Mayo 23, 1980 sa Roxas District, Quezon City.

Si kanhi Judge Marcelino Escalona ang giingong mikasal ni Loot ug ni Nicandro ug sila si Wilfredo Villaroz ug Timotea de Leon maoy padrino ug padrina sa duha.

Si Arrogante mipasangil sa iyang complaint nga si Loot, bisan og usa kini ka minyo, nakigrelasyon kini ug nakigtipon usab kini sa usa ka Japanese national hangtod nga si Loot ug ang Hapon nakabaton og anak. Si Sun Shimura nga kandidato pagka-mayor sa Daanbantayan maoy gitumbok nga anak.

Niadtong tuig 1991, ang incumbent mayor ug si Sr. Supt. Loot kinsa minyo usab sa usa ka anak og heneral sa polis nagkita ug nagpuyo.

Ang incumbent mayor migamit sa apilyedo nga Loot sa iyang mga dokumento ilabi na sa iyang pagduso og certificate of candidacy, apan matud pa ni Arrogante nga walay nakatala sa National Statistics Office nga magmatuod nga ang duha kasado.

Walay nakatala usab sa rekord sa NSO nga ang kasal sa incumbent mayor ug ni Nicandro na-annul na.