Gwen ipa-contempt sa mga rebelde

Gihangyo sa Communist Party of the Philippines-New People''s Army-National Democratic Front (CPP-NPA-NDF) ang korte nga ipa-contempt sila si Gobernador Gwendolyn Garcia ug duha ka opisyal sa Cebu Provincial Detention and Rehabilitation Center.

Kini gumikan sa wala pagtuman sa kamandoan sa Regional Trial Court nga makapangampanya sa iyang kandidatura ang ilang sakop nga si Jigger Geverola, kinsa usa ka political prisoner sa CPDRC nga gidumala sa Kapitolyo.

Si Geverola kandidato sa pagka-konsehal sa lungsod sa Argao sa umaabot eleksiyon sa Mayo 14, 2007.

Ang RTC sa dakbayan sa Toledo niluwat og kamandoan nga tugtan si Geverola nga makapangampanya ug makabotar sa eleksiyon.

Apan sa mosyon nga giduso sa kadagkoan sa CPP-NPA-NDF nga gipanguluhan ni Silvino Clamucha ngadto sa korte, ilang gipasanginlan sila si Garcia, jail consultant Byron Garcia ug jail warden Alito Gabuya nga wala motuman sa maong kamandoan.

Sayo niini si Byron gikataho nga nagdumili sa paghatag og security kang Geverola sa iyang pagpangampanya sanglit iya kining giisip nga kaaway.

Sumala pa ni Atty. Alfonso Cinco IV kinsa maoy niduso sa mosyon nga ang gihimo ni Byron nga gitugutan usab sa gobernador tataw nga wala pagtahud sa kamandoan sa korte.