Mipatay sa iyang misis naghikog

Usa ka mamaligyaay og utanon diha sa Carbon Market ang mipatay sa iyang kapuyo dayon nag-unay og dunggab sa iyang dughan diha sulod sa giabangang lawak sa sitio Villa Zacarte sa Basak-Pardo ning dakbayan niadtong milabay''ng hapon.

Ang parehong napalgang patay na giilang sila si Mary Joy delos Santos alyas Joy, hingkod ang panuigon ug ang iyang kapuyong si Sergio Armamento,67.

Ang duha parehong nag-abang og lawak sa panimalay sa pamilyang Celeste ug nalambigit sa negosyo og utanon diha sa Carbon.

Sumala pang PO3 Henry Estoy sa Homicide Section duha ka magsuong anak sa banay''ng Celeste ang nakadungog sa panagbangi sa magtiayon diha sa ilang lawak.

Dangtan pila ka gutlo nadunggan nalang sa duha ka mga batan-on nga dunay misinggit og "Agay Tay" hinungdan nga ilang gisusi ang pikas lawak nga giukopar sa duha.

Gikatahong nakit-an nalang nila si delos Santos nga nagkadugo ang dughan ug nagbuy-od na sa sawog samtang si Armamento nagbarog diha tungod niini ug naghupot og kutsilyo.

Diha-diha gikatahong nakit-an sa magsuon nga gihansak ni Armamento ang kutsilyo sa iyang walang dughan ug nahagba diha sa salog hinungdan nga nanawag og tabang ang managsuon sa mga silingan.

Ang mga sakop sa Emergency Rescue Unit Foundation nga gipanguluhan ni Bryan Gamba misuway sa pagluwas sa duha apan pareho gyud silang nakabsan sa ilang mga kinabuhi.

Sa pag-abot sa grupo ni Estoy pinanguluhan ni PO3 Rogelio Nedamo napalgan nagtaop pa ang kutsilyo diha sa dughan niini ug pareho ang duha nga wala nay kinabuhi.

Nasayran sa kapolisan gikan kang Sandra Ahig,44, barangay tanod sa Basak-Pardo nga niadtong milabay''ng semana midangop sa barangay hall si delos Santos ug misumbong nga gihulga siyang patyon sa iyang kapuyo tungod kay kini nagselos.