Lalaki gipusil sa Akrho

Nalandig sa tambalanan ang usa ka 24-anyos nga lalaki human kini pusila sa usa sa tulo ka mga lalaki nga duha kanila giilang mga miyembro sa Alpa Kappa Rho (Akrho) fraternity kagahapon sa kaadlawon diha sulod sa usa ka imnanan sa Tabunok, Talisay.

Ang biktima giila sa mga polis nga si Niel Abume, residente sa Sitio Mahayahay, San Isidro sa maong dakbayan kinsa nakaangkon og samad pinusilan sa iyang tiyan ug tuong abaga daling gidala diha sa Talisay District Hospital apan tungod sa kahimtang niini gibalhin sa Vicente Sotto Memorial Medical Center niining dakbayan.

Ang mga suspetsado giila lang sa mga polis sa ngalan nga Majimbo, Junrey ug Johnmar (wala mailhi ang mga apelyido niini) kinsa daling miikyas human sa maong insidente.

Base sa gipahigayong imbestigasyon sa Homicide Section sa Talisay pinangulohan ni PO2 Harrison Quiñanola nga si Abume uban sa iyang mga paryente nag-inom sa dihang naabot ang tulo ka suspetsado ug mipusil si Majimbo ngadtong Abume.