Kini maoy gipadayag ni Cuenco subay usab sa kanunay nga pagwasay kaniya ni Guardo bisan dugay nang gi-dismiss sa Ombudsman Visayas gumikan sa kakuwang sa mga ebidensya.
Si Cuenco miingon nga klaro kaayo ang pagpanglingla ni Guardo diha sa ilang distrito sa matag kampanya niini sa kabaranggayan diin kanunay ibalik-ibalik ang isyu sa pagpamalit og multicabs.
Gipasabot niini nga ang tinuoray untang isyu mao nga ibutyag o ipasabot ni Guardo ngadto sa katawhan sa ilang distrito kun hain na ang pundo sa Asean Games nga wala gyuy husay ug dili ang isyu sa multicabs nga dugay na kining patay.
Samtang subay usab niini gibutyag sa kongresista nga padayon karong gimonitor sa PNP ang giingong mga goons ni Guardo nga aktibo pa nga mga sakop sa PNP.
Iyang giklaro nga sa panahon nga ilang mahuptan ang saktong ebidensiya hayan ilang pakasuhan ang maong mga polis nga gihimo karong goons ni Guardo nga gipalihok sa kabaranggayan.
Naalarma ang kongresista dihang ang mga sakop sa PNP ug AFP maoy mitaho kaniya nga magbantay sa iyang kaugalingon gumikan sa hulga sa kinabuhi niini.
Samtang si Guardo sa iyang bahin miingon nga dili niya ihunong sa kampanya sa kabarangayan ang pagtaho sa katawhan nga pagpangurakot ni Cuenco ug paghimong negosyo sa politika.
Iyang giklaro nga kun wa pa niya mabantayi ang kalaki ni Cuenco hayan madayon ang transaksiyon niini nga pag-overprice sa presyo sa multicabs.
Subay niini iya usab nga gihagit si Cuenco nga mopagawas kini og mga ebidensiya batok kaniya labot sa Sea Games gumikan kay dili siya ang moprobar niini kun dili ang kongresista nga miakusar.
Gihagit usab niya si Cuenco nga kun tinuoray nga aduna siyay mga goons nga sakop ra usab sa kapolisan ipadakop unta kini sa kongresista.