Kolektor gipusil sa mga tulisan diha sa Mabolo

Usa ka kolektor sa usa ka trucking services ang gipusil ug giilugan sa iyang gidalang bag nga may sulod nga salapi ug duha ka mahalong cellular phone diha sa dalan M.J.Cuenco sa may Mabolo kagahapon sa hapon.

Giila ni SPO1 Genilo Veraque, imbestigador sa Theft and Robbery Section ang biktima mao si Cotilde Ablan,51, residente sa San Jose Extention ning dakbayan.

Sumala pang Veraque sa Banat News nga gikan pa nangolekta ang biktima og salapi sa mga kustomer sa igsuon niining maoy tag-iya sa trucking services diha sa maong dapit dihang nahitabo ang pagpanulis.

Matud pa ni Veraque nag-atang og masakyang PUJ si Ablan dihang giduol sa duha ka wala mailhing mga suspek ug kalit siyang gipusil sa usa dihang nahagba siya sa dalan gikuha dayon sa duha ang iyang bag.

Gibana-banang di momenus sa P100 mil ang sulod sa maong bag nga kinolekta sa biktima. Ang mga suspek daling midagan sa direksyon sa siyudad samtang ang biktima daling gidala sa Perpetual Soccour Hospital alang sa pagpatambal.

Wala pa matino sa TRS kung giatangan nang daan ang biktima sa mga suspek.

Ang biktima gipusil diha sa tuong kilid ug ang bala nag-ungot pa diha sa iyang walang bahin sa lawas ug kasamtangang gioperahan atol ning pagsuwat ning balita sumala pang Veraque.