Si Supt. Erson Digal, Deputy for Operation sa Cebu Provincial Police Office ug laing sakop sa Provincial Investigation and Detective Management Branch (PIDMB) maoy gitahasan ni Sr. Supt. Carmelo Valmoria, hepe sa Cebu Provincial Police Office nga mo-imbestigar sa maong kaso.
Si Valmoria nipadala og Task group Hope Bantayan ug sub-task group Bantayan nga maoy mo-cover sa tibuok Bantayan Island ilabi na sa lungsod sa Madredijos aron masanta ang tensyon sa mga tigsuporta.
"With regards to placing the whole Bantayan or Madredijos under Comelec Control we are still evaluating on this kay sa nahitabo dili pa gyud ingon nga ibutang nato sa Comelec Control" matud ni Valmoria.
Si Valmoria nagkanayon nga iyang girespito ang rekomendasyon sa mga kandidato nga magpapili pagka mayor sa maong lungsod apan iyang hangyuon nga mohimo og pormal nga reklamo ug i-address ngadto sa Commission on Elections dili sa PNP kay ang Comelec maoy dunay dakung katungod sa pagdeklara sa Comelec control sa usa ka lugar.
Gibutyag ni Valmoria nga ang sub task group ug laing augmentation force gikan sa Regional Mobile Group (RMG) ug laing personnel ang nigikan na kagahapon sa buntag paingon sa nahisgutang lungsod isip dugang puwersa aron malinawon ug hapsay ang eleksiyon karong Mayo.
Hinuon wala kini motug-an kung pila ka personnel ug mga sakop sa RMG ang gipadala niya sa Madredijos.
Nunot sa daghang mga reklamo nga dunay armadong tawo nga gituohang goons sa mga politiko giawhag ni Valmoria ang hepe sa maong lungsod nga mopahigayon og subsub nga checkpoints matag karon ug unya aron masikop kining mga tawo nga magdala og mga armas nga walay lisensiya.
Gisultihan ni Valmoria si Digal nga makig-alayon sa mga kapitan sakop sa Madredijos ug mopahigayon og census sa 14 ka barangay pinaagi niini mailhan ug mahibaw-an kadtong bag-ong mga tawo nga niabot ug nipuyo sa usa ka barangay.
Nagtuo si Valmoria nga dako kaayo og ikatabang ang maong paagi ug nanghinaot siya nga abagan lang unta sa mga lomulopyo ug mga opisyales sa barangay ang maong kalihukan.
Si Valmoria wala pa mohatag og pamahayag sa nahitabo niadtong Martes kung duna bay kalabutan sa politika ang maong hitabo.
Matud sa CPPO director nga iyang paaboton ang pormal nga reklamo ni Mayor Letty Mancio ug ang resulta sa gihimong imbestigasyon sa iyang mga sakop nga gipadala didto sa maong lungsod.