Ang namatay sa maong disgrasya mao si Dexter Capul Belarmino, 34, minyo ug nagpuyo sa Looc, Mandaue ug empleyado sa Lufthansa Airways isip mekaniko ug maoy nagmaneho sa 400 cc nga bigbike. Lakip sa namatay mao si Jonathan Manching Legara, 35, minyo ug nagpuyo sa Gun-ob, Lapu-Lapu ug empleyado sa Bax Global nga nahimutang sa Mactan Cebu International Airport. Si PO3 Ruel Nalzaro sa Traffic Division sa Lapu-Lapu nagkanayon sa iyang imbestigasyon nga si PO3 Jacinto Mandal Jr., sakop sa SWAT sa Lapu-Lapu nagposte sa Maximo Patalinjug Avenue sa dihang mihaguros og padagan sa ilang giluwanang motor silang Belarmino ug Legara padulong sa Marigondon.
Gumikan sa pagduda ni PO3 Mandal nga kini adunay naggukod nga mga miyembro sa fraternity, iya kining gisundan apan pipila ka metros sa iyang pagsunod kalit nga mipaka ang makusog nga buto.
Nakita ni PO3 Mandal nga nabangga sa duha ka poste ang mga biktima ug nalabay sa sementadong tindahan si Legara hinungdan sa pagkabuak sa iyang ulo human kini maigo sa kanto sa tindahan. Matud pa ni PO3 Mandal nga ang duha wala magsul-ob sa ilang helmet hinungdan sa kagrabe sa ilang nahiaguman nga kadaot sa ulo diin namatay sila diha dayon ug wala na madala sa tambalanan.
Gidudahan ni PO3 Nalzaro nga posibleng gikan ang duha sa ilang trabaho ug gihatod ni Belarmino si Legara ngadto sa panimalay niini sa Gun-ob ug gumikan sa kakusog sa dagan niini wala makakontrolar si Belarmino atol sa likoon nga bahin sa maong dapit.