Pagsumiti og position paper natapos na

Gihatag nga lugway alang sa pagsumitir og position paper sa mga kandidato nga pagka mayor sa dakbayan sa Mandaue nga mipasaka og petisyon sa kaatbang nilang kandidato natapos na niadtong Lunes.

Si Comelec Regional Director Rene Buac sa panagtagbo nga gihimo niadtong Abril 10 miingon nga ang lima ka adlaw nga lugway maoy paghatag og kahigayonan alang sa pagsumitir og dugang mga dokumento.

Si Mayoralty Candidate Thadeo Jovito Jonkie Ouano maoy iyang gipitisyonan ang kandidato sa pagka mayor nga sila si Eric Yap Fortuna ug Lolita Ouano.

Samtang si Mayoralty Candidate Jonas Cortes maoy iyang gipitisyonan si Edgar Cortes kinsa miduso usab sa iyang kandidatora sa pagka mayor uban sa iyang line up nga bise mayor ug mga konsehales.

Si Buac miingon nga ilang iduso sa ulohan nilang buhatan sa Manila ang mga ebidensiya sa ilang petisyon sa mga kandidato alang sa pagpakanaog og tukmang hukom nga maoy basehan alang sa pagpadayon o dili sa ilang kandidatora.

Matud pa sa director nga mahuman sa pagpakanaog og hukom nga mag-disqualify sa kandidatora sa gipitisyonan nga kandidato sa gihapon may kahigayonan pa sa pagpasaka og motion for reconsideration.