BIN sa Daanbantayan gireklamo ni Dodong Itok

Mireklamo si Enhinyero Augusto "Dodong Itok" Corro sa kadagkuan sa kwerpo sa kapolisan sa probinsya sa Sugbu sa giingong padayon nga kalihukan sa mga membro sa Barangay Intelligence Network kon (BIN).

Sa reklamo nga giduso ni Corro sa buhatan ni Senior Supt. Carmelo Valmoria, hepe sa kapolisan sa probinsya siya mipasabot nga ang mga BIN maoy naghimo nga security escort ni Mayor Ma. Luisa Loot ingon man sa anak niini nga mudagan sa pagka mayor.

Matud pa ni Corro nga maoy iyang nahibaw-an nga usa sa sakop sa BIN adunay giatubang nga sumbong sa korte. Hinoon nakagawas kini gumikan sa probisyon.

Giila ni Corro ang natungdan nga sakop sa BIN nga usa ka Ivan "Bong" Lucero.

Si Lucero gitumbok ni Corro nga maoy nagsilbi nga security escort ni Sun Shimura, anak ni Mayor Loot nga maoy mudagan sa pagka mayor.

Nabalaka si Corro nga kon dili masanta ang mga sakop sa BIN sa ilang mga kalihukan mahimong makahatag kini og kagubot.

Gipasanginlan ni Corro nga ang mga BIN maoy gigamit sa pagpanghasi sa mga lider niya sa politika sa kabarangayan.

Gawas kang Lucero laing mga sakop sa BIN nga gusto nga mahunong na ang ilang kalihukan naglakip nila ni Riel Recla, Lynley Inot, Marciano Pepito Jr. ug usa ka Edry Go.

Samtang si Corrro midugang sa pag-ingon nga maoy iyang tinguha nga mopatigbabaw gayud ang kalinaw sa tibuok lungsod sa Daan Bantayan,

Nanawagan siya sa kadagkuan sa kapolisan nga hatagan sa dinalian nga aksyon ang ilang mga problema nga gipaabot ngadto sa katawhan.