Polis napusilan sa tiil atol sa patrol

Usa ka polis ang nalandig sa tambalanan human maigo sa bala sa pusil samtang nikuyog sa nagpatrolya sa Miscellaneous Team sa Mambaling Police Station bahin asa illegal nga kalihokan diha sa Sitio Plastikan, Duljo Fatima ning dakbayan sa Sugbu.

Samdan sa tuong tiil ug gidala sa Cebu City Medical Center si PO1 Elyser Zapico Cañete, 27, minyo ug nadestino sa Regional Mobile Group 7 nga nagbase sa Barangay Bahay Sibonga Sugbu ug residente sa No. 7 F. Pacaña Punta Princesa ning dakbayan.

Ang kapolisan padayon pang nihimo og pakisusi sa krimen kung si kinsa ang responsable sa pagpamusil sa maong pulis.

Base sa pasiunang imbestigasyon ni PO3 Roger Nedamo sa Homicide Section nasayran ang biktima nikuyog ni SPO1 Joseph Toring, SPO1 Rene Sebes, PO3 Paul John Bacalso ug PO2 Dominador Manosor nga mga sakop sa Miscellaneuos Team sa Mambaling Police Station kinsa nag-roving sa Sitio Plastikan batok sa illegal nga drugas.

Ilang nabati ang tulo ka sunodsunod nga buto sa wala matinonbg kalibre sa armas dangtang pila ka gutlo nabatyagan ni Zapico nga namanhod ang iyang tuong tiil ug sa pagtan-aw nagkadugo na kini .

Daling gidala sa CCMC ang biktima aron patambalan.

Sa dugang pakisusi ni PO3 Nedamo ang biktima miadto sa Mambaling Police Station ug nihatag og "tip" sa Miscellaneous Team bahin sa presensya sa ginganlan og "Roco" nga usa ka drug personality nga gituohang nag operate diha sa Duljo.

"Wala ni siya madestino diri (biktima)igo lang gyud ni tawon nihatag og tip diri sa akong mga kauban, luwas naman hinuon siya" asoy ni SPO1 Daniel Tarucan sa Mambaling Police nga nahinabi sa Banat News.