Polis nabalitok sa motor

Usa ka polis ang naangol ug nalandig sa tambalanan human ang gimanehong motorsiklo kalit lang gilabangan sa usa ka lolo nga nagsakay og biseklita sa dalan Diosdado Macapagal Hi-way Poblacion dakbayan sa Toledo kagahapon sa kaadlawon.

Si SPO3 Rene Quiros, 47, minyo, residente sa Aliwanay Balamban kinsa nagmaneho sa Honda Wave kolor pula YQ-5247 ang nalandig sa Toledo District Hospital apan gibalhin sa usa sa mga tambalanan sa dakbayan sa Sugbu human makahiagom og mga samad sa kalawasan.

Basa taho sa kapolisan si Quiros gikan sa Balamban paingon sa Sibonga aron mo-attend sa Physical Fitness Test.

Si SPO3 Quiros samtang nagdagan subay sa national road pag-abot sa eskina duol sa Police Station sa Toledo dihay usa ka bisiklita ang kalit nilabang nga gidala ni Ladislao Villanueva, 70, minyo nga taga Luray Uno Poblacion.

Wala na makalihay si SPO3 Quiros ug iyang naigo si Villanueva hinungdan nga nangatumba silang duha sa sementadong kalsada.

Si Villanueva daling gidala sa Toledo District Hospital ug padayon pang giatiman sa mga doktor human makaangkon usab og mga samad sa kalawasan.

Hinuon gikatahong luwas ra silang duha samtang ang motorsiklo ni Quiros nakaangkon og dakong damage.