Busay accident sulbad na

Gikunsiderar na sa Homicide Section nga sulbad na ang aksidente nga nakapatay sa manag-amahan niadtong milabay''ng Lunes ug kini natino nga aksidente gyud.

Si Homicide Section chief, Police Inspector Mario Monilar mitug-an sa Banat News nga aksidente gyud ang nahitabo nga nakaingon sa kamatayon nila ni Engineer Saturnino Plaza ug anak niining si Genar Leo,9 anyos.

Ang duha taga Dumlog dakbayan sa Talisay, nangamatay ug nahagbong sa gibana-banang 300 metros ang gilawmon diha sa sitio Maaslom sa Busay.

Si Darby Arcillo nga maoy testigo sa pagkahitabo uban nila ni Inspector Mario Monilar ug mga kabanay sa mga namatay misubay og balik diin niya unang nasundan ang sakyanan sa manag-amahan.

Matud pang Monilar sa Banat News nga gibana-banang 400 metros ang gilay-on una sa dapit nga gikahagbungan sa mga biktima nagsunod nang daan si Arcillo.

Gikatahong diha palang namatikdan na ni Arcillo nga dili na normal ang dagan sa sakyanan nga Hyundai nga iyang gisundan gani gisuwayan pa niya og overtake apan gikatahong mo-ekis ang dagan niini, matud pang Monilar.

Dihang gibana-banang mga 100 ka gatos nalang ka metros ang gilay-on gikan sa nahagbungan diha na nakita ni Arcillo nga gikuptan sa bata ang manobela dayon nalahos na ngadto sa kahagbong.

"Mga 100 meters before sa incident area, nakita niya(Arcillo) ang bata nga nikupot sa manibela..murag ang atong tan-aw nga ang bata mi-try gyud nga masalbar silang duha, indication kini nga duna gyuy di na maayong nabatyagan sa lawas ang amahan diha palang sa unahan," asoy pang Monilar.

Matud pang Monilar nga mismong ang bata dihang naduolan ni Arcillo ug ubang mga mitabang pagluwas kanila nadunggan nga miingon nga "Tabanga ninyo akong papa."

Hinuon ang pamilya sa mga biktima matud pang Monilar nga walay planong ipa-awtopsiya ang mga patay''ng lawas sa mga biktima basta ang importante nga matino lang gyud kung aksidente ang nahitabo.

Sumala pang Monilar nga sukad nga nagsunod na si Arcillo sa sakyanan sa mga biktima walay laing sakyanan nga diha sa ilang giagian hangtud nga nahitabo ang aksidente.

"Purely aksidente ra gyud to," panapos pang Monilar.