Ang biktima giila sa mga polis nga si Ramie Taraya residente sa nahisgutang lugar, kinsa nakaangkon og samad pinusilan taliwala sa likod nga bahin sa iyang ulo diin ang bala milahos sa agtang ug daling gidala diha sa Talisay District Hospital apan gideklarar kini sa doktor nga patay na nga naabot sa nahisgutang tambalanan.
Si PO2 Harrison Quiñanola mibutyag kagahapon sa Banat News nga si Taraya usa sa gidudahang akyat bahay ug daghang nasuko niini tungod kay ang biktima maoy gipasanginlan sa uban niining mga silingan nga usa sa responsable sa mga nahitabong kawat diha sa ilang lugar.
Sa wala pa mahitabo ang pagpamusil, si Taraya uban nila ni Arman Campo ug Christian Panilag nagtan-aw kini og tv diha sulod sa balay sa magtiayong Ferdinand ug Susan Quinto.
Kalit nga adunay nabating buto sa pusil ug human sa maong buto mihagba diha sa sawog nga semento si Taraya ug nasuta nga gipusil kini.
Matud ni Quiñanola nga base sa ilang imbestigasyon adunay nasuko ni Taraya ilabi na ang uban niining silingan tungod kay usa kini sa gikatahapang responsable sa mga kawat nga nahitabo sa ilang barangay.
Ang kapolisan nakakuha og usa ka kabhang sa bala sa kalibre .45 nga pistola diha sa lugar nga nahitaboan.