Petisyon ni Tining ''sayop nga paghot

Daw sa nagpaghot sa sayop nga punoan sa kahoy ang kandidato sa pagka-kongresista sa ikaupat nga distrito, Bogo Mayor Celestino "Tining" Martinez III, sa iyang pagsang-at og petisyon sa pagpa-disqualify sa iyang kaatbang, kanhi Bokal Benhur Salimbangon.

Ang petisyon ni Martinez batok kang Salimbangon gisang-at ngadto sa buhatan sa Commission on Elections sa pasangil nga dili rehistrado si Salimbangon isip botante sa bisan asang presinto sa ikaupat nga distrito.

Matud pa ni Salimbangon nga ang kontra ni Martinez dili siya kun dili ang korte nga maoy ningmando sa Comelec nga ibutang ang iyang pangalan isip botante sa barangay Agujo, lungsod sa Daanbantayan.

Ang maong kamandoan giluwatan ni Municipal Circuit Trial Court Judge Cornelio Jaca niadtong Marso 26, 2007, tulo ka adlaw sa wala pa ang katapusang adlaw sa pagsang-at sa certificate of candidacy niadtong Marso 29, 2007.

Si Salimbangon nisang-at sa iyang COC sa pagka-kongresista niadtong Marso 28 apan nakasugat kini og petisyon gikan ni Martinez.

Nunot niini, si Salimbangon nagkanayun nga ang angayang petisyonan ni Martinez mao ang korte ug dili siya.

Si Salimbangon igo lang niduso og petisyon nga naghangyo sa korte nga ibalik ang iyang pangalan sa listahan sa mga botante human kini gitangtang gumikan sa iyang kapakyas sa pagbotar sa niaging duha ka eleksiyon.

Si Salimbangon narehistro sa barangay Curva, lungsod sa Medellin apan iya kining gipabalhin sa barangay Agujo, Daanbantayan diin dunay propriedad ang ilang pamilya.