Inahan napatay sa anak

Patay ang usa ka 67 anyos nga inahan human kini aksidenteng madunggabi sa iyang kaugalingong anak nga nakakita og away batok sa ilang silingan diha sa Purok III, Lower Camputhaw ning dakbayan niadtong milabay''ng gabii.

Ang namatay giilang si Modesta Durens, 67, residente sa maong dapit human kini madunggabi sa iyang anak nga si Mariano Durens, Jr. alyas Junjun, 31, ikatulong anak sa biktima.

Sa imbestigasyon sa Homicide Section nasuta nga ang suspek sayo pa niana nakakita og lalis tali sa ilang silingang si Christito Quiñones alyas Totoy, 64.

Si SPO3 Alfonso Flordeliz, nga maoy community cop sa maong lugar sa gihinabi sa Banat News kagahapon kinsa maoy miresponde sa insidente nagkanayon nga naglalis ang duha kabahin sa anak ni Quiñones nga nag-abang diha sa balay sa mga Durens.

Gikatahong ang panaglalis nisangpot sa pagkuha ni Durens og kutsilyo apan ang iyang inahang si Modesta nga nakabantay nang daan sa kagubot daling mibabag sa anak.

Dihang giingong gihansakan ni Durens si Quiñones gibabagan kini ni Modesta ug ang kutsilyo misampak diha sa iyang walang dughan hinungdan sa pagkahagba niini.

Ang mga silingan nga nakakita sa kahimtang ni Modesta mao nay misalbar kaniya sanglit gikatahong wala gihapon mohunong si Mariano sa pagwala og mipadayon gyud og dunggab kang Quiñones.

Si Quiñones nadunggaban usab diha sa walang bahin sa liog ug sa abaga ug daling gidala sa Cebu City Medical Center ug luwas na ang kahimtang.

Si Flordeliz nagkanayon nga pag-abot nila diha sa lugar human pahibaw-a sa mga tanod nakit-an nalang nila si Modesta nga nagtuk-ong ug nagkadugo, nagtuo pa silang ang dugo diha sa dughan niini gikan sa samad ni Quiñones apan dihang ilang gisusi duna kini samad sa dughan maong gidali kini og dala sa Vicente Sotto Memorial Medical Center apan dangtan pila ka gutlo nakabsan kini sa kinabuhi pagkakaadlawon.

Si Mariano dali usab nga nadakpan sa mga polis ug gikatakda nang pasakaan og kaso karong adlawa.