Banay sa naaksidente midangop sa CCPO

Midangop sa buhatan sa Homicide Section ang kabanay sa manag-amahang Engineer Saturnino Plaza ug Genar Leo Plaza kinsa nangasunog ug namatay dihang nahagbong sa 300 ka tiil nga bung-aw sa sitio Maaslom sa Busay ang ilang sakyanan niadtong Lunes sa buntag.

Si Inspector Mario Monilar, hepe sa Homicide Section mitug-an sa mga tigbalita nga ang miadto mao ang asawa, anak ug mga igsuon sa mga namatay kagahapon sa buntag.

Matud pang Monilar mianha sa ilang buhatan ang pamilya dili tungod kay duna sila''y pagduda sa kamatayon sa duha kundili aron maklaro gyud kung unsay nahitabo.

Sumala pang Monilar ilang susihon kung tinuyo ba ang aksidente, kung duna bay nisabotahe sa sakyanan aron kini mosiga.

Hinuon giklaro ni Monilar nga posibleng tungod sa kakalit sa hitabo ang nakit-an sa witness nga si Darby Arcillo kinsa naatol nga diha sa pagsiga ug pagkahulog sa sakyanan nagtuo gyud kining nagtuon ang bata og drive sanglit sa una niining pamahayag daw gisabak sa amahan ang bata, apan wala usab siya makahinumdom kung nagsiga na ba ang sakyanan o wala pa niadtong tungora.

Apan laing testigo nga gihinabi sa Homicide Section mao si Ging-ging Ardiente nga nagpuyo diha sa dapit kinsa miingon nga nakakita siya sa pagkahagbong sa sakyanan nga nagdilaab na.

Si Monilar nagkanayon nga base sa nakuhang impormasyon gikan sa kabanay sa mga biktima nasayran nga ang pultahan sa tuong bahin sa front seat gubaon ug gikinahanglan pang tuyokon ang samin sa bintana niini aron maabli gikan sa gawas.

Usa usab sa obserbasyon ni Monilar mao nga tinted ang samin sa sakyanan ug di kaayo maklaro ang mga tawo sa sulod. Usa sa mga teyorya ni Monilar mao nga posibleng sa diha pa sa kalsada nakamatikod ng daan si Saturnino nga dunay problema ang sakyanan.

Ug ang nakit-an sa mga testigos nga gisabak sa drayber ang bata posibleng kadto tungod kay diha gipaagi sa amahan ang anak aron silang duha parehong makagawas apan nahagbong na ang sakyanan sa bung-aw.

Matud pang Monilar ilang imbitahon ang tanang mga testigos, ug tigumon ang mga pamahayag sa mga kabanay sa mga biktima aron maanalisar ang estorya sa hitabo.-EIM