Si retired major Vicente Mercado, hepe sa Squatters Prevention Encroachment and Elimination Division, namahayag nga walay "due process" ang imbestigasyon nga gihimo ni City Hall Ombudsman Orlando Secretario.
Matud ni Mercado nga kun aprobahan man gani ni Osmeña ang gisugyot nga siya suspensohon, mohimo siya og motion for reconsideration aron awhagon ang mayor nga usbon ang iyang hukom.
Si Secretario miingon nga nahukman niyang sad-an si Mercado sa sala nga nahimo sa iyang sakop kay wala man kini mohimo og diha-diha nga imbestigasyon batok sa iyang property custodian nga si Enriquita Crispe.
Si Crispe girekomendar usab ni Secretario nga suspensohon bali’g unom ka buwan apan duna hinuo’y ubang opisyal sa City Hall nga miingon nga angay g’yod kining taktakon og pasakaan og kaso.
Ang report mao nga si Crispe mibaligya sa 1,950 kilos nga mga karaang medical equipment nga wala na gamita sa Cebu City Medical Center ug didto gibutang sa stockroom sa SPEED.
Sa pagtuo nga nakalimtan na ang maong mga butang, si Crispe mipabaligya niini kaniadtong Pebrero 10. Ang mga gibaligya nga butang nga naglakip sa brain scanner, ECG machine, ultra sound, dental X-Ray machine, mga wheel chair ug daghan pa, nasakmit pagbalik nila ni Marquez didto sa JP Pardillo Junk Shop.
Si Mercado misuway sa pagpangatarungan nga naghulma na unta siya og three-man investigating team, apan wala kini makasugod sa imbestigasyon kay nag-imbestigar na ang taga City Hall.