Air force gikulata bisan samdan ipasusi

Andam nga pa-imbestigahan ni Sr.Supt. Patrocinio Comendador ang iyang mga sakop sa San Nicolas Police Station kabahin sa pasangil sa asawa sa napatay nga sakop sa Philippine Air Force nga gikulata iyang bana bisan kini samaron na.

Si Comendador mitug-an nga kung dunay isang-at nga pormal nga reklamo ang kabanay ni Sgt. Darwin Busico ngadto sa ilang buhatan kabahin sa pagresponde ila kining imbestigahon dayon.

Si Busico napatay dihang gikapinusilay si PO2 Jessie Yramis, sakop sa San Nicolas Police Station niadtong Huwebes Santo sa kaadlawon diha gawas sa usa ka imnanan sa dalan Abella sa barangay San Nicolas.

Si Yramis napatay usab sa maong insidente, dunay managlahing mga bersyon nga migawas sa hitabo sumala pa sa pasiunang imbestigasyon sa kapolisan.

Dunay miingon nga miresponde si Yramis sa alarma nga armadong tawo diha sa imnanan apan duna say bersyon ang mga kauban ni Busico nga nangita kini sa nahibiling cellphone.

Sa giluwatang pamahayag sa duha ka kainom ni Busico, nga sila si Renato Paon ug Arnel Jurado, miabot ang kapuyo ni Busico ug gihagad kini nga mamauli.

Nianang tungura miabot si Yramis ug mirekisa sa mga kainom ni Busico apan gisitar kini sa naulahi ug gipangutana kung polis ba gyud kini dungan sa pagpailang siya sakop sa PAF, si Yramis gikatahong mitubag og "Dili lang ta mag-unay" dayon mipadayon sa pagrekisa sa ubang mga nag-inom ug migawas.

Diha sa gawas nasugatan ni Yramis ang asawa ni Busico kinsa miadto diay sa police station gibana-banang di molapas 100 ka metros ang distansya ug kauban na niini si PO2 Jasper Nuñez.

Matud pa sa duha, ang asawa ni Busico nagpunay og bagulbol ug mitulisok kang Yramis maong gitapi ni Yramis ang kamot niini apan wala kini ikahimuot ni Busico ug gisitar ang polis ug nahitabo na ang tinukmuray hangtud nga nagpinusilay.

Si Paon nagkanayon nga si Yramis mibunot sa iyang armas ug mipusil kang Busico samtang ang naulahi mibunot usab sa iyang armas ug nagsinukliay na sila og bala.

Human sa buto-buto, si Yramis nagbuy-od na sa dalan samtang si Busico nangita og masakyang taxi aron magpahatud sa tambalanan.

Usa ka sakyanan sa Visayan Electric Cooperative ang gihangyo ni Paon nga sakyan kang Busico apan pagduol palang nila sa samarong sundalo giingong gipangtiunan sila ni Nuñez og armas dayon gisultihan nga dili na pa-apil-apilon.

Ang duha ka testigos sa kahadlok daling namauli sa ilang mga panimalay ug wala na makahibalo sa misunod nga panghitabo.

Ang asawa ni Busico mipasangil nga imbes nga dad-on dayon sa tambalanan ang iyang bana gitabangan pa kini og kulata sa mga nirespondeng mga polis gikan sa San Nicolas police station, lakip na niini si Nuñez.

Si Comendador miingon nga dihang giduol sa mga polis si Busico nagtuo silang nagunit pa kini sa iyang armas.

"At the time of the arrest, nagtuo man silang threat pa ang sundalo kay wala dayon daw mohatag sa armas mao to ila gyung gihimo ang proseso sa pag-aresto," asoy pang Comendador.

Kagahapon gipatawag ni Inspector Mario Monilar ang tanang mga testigos ug mga personaheng posibleng diha sa pagkahitabo apan bugtong si Nuñez ray mipakita sa ilang buhatan.

Si Comendador nagkanayon nga si Nuñez midumili sa paghatag og pamahayag kabahin sa nahitabo bisan nga kini diha sa aktwal nga pagpinusilay sa duha.

Hangtud nga wala pa matapok ang tanang pamahayag sa mga saksi dili pa usab matino kung kinsay sad-an sa maong insidente sumala pa sa mga imbestigador.

Matud pang Comendador gidid-an si Nuñez sa abogado niini nga mohatag og pamahayag sa kabalakang makaapektar unya sa imbestigasyon.

Apan usa ka opisyal sa usa ka special investigating unit sa kapolisan ang miingon nga kung dunay ingon nianang pasangil nga gikulata sa mga mirespondeng polis ang samaron, usa na kini ka dakong kalapasan.

Matud pa sa maong opisyal nga mahimo na kining sukaranan aron himoan og imbestigasyon ang hingtungdang mga polis aron pagklaro sa hitabo.