Pangubkob og balas sa Tabunok misiaw

Nagtingkagol karon diha sa Talisay police detention cell ang lima ka lalaki kinsa suspetsado sa pagpangubkob og balas ug graba diha sa sapa sa dakbayan sa Talisay.

Ang mga suspetsado giila sa mga polis sa nahisgutang siyudad nga si Luis ug Alfred Chavez, 48 ug 56-anyos, mga residente sa Lawaan III sa nahisgutang dakbayan, Mario Wapalio, 53, Bernabe Briones, 40, pulos taga Sitio Kawayan Lagtang ug Jolilto Bayabado, 24, residente usab sa Lawaan III.

Ang lima gikatahong naaktohan sa mga polis nga nagsugod na og kubkub og balas diha sa sapa habig sa likod sa merkado sa Tabunok niadtong Lunes sa hapon.

Usa ka concerned citizen diha sa Barangay Lagtang ang mitaho sa mga polis kabahin sa ilegal nga kalihukan sa mga suspetsado.

Kahinumduman nga ang kagamhanan sa Talisay miluwat og ordinansa batok sa mga manguha og mga balas ug graba diha sa dagat ug mga sapa sa dakbayan paglikay sa disgrasya.

Gikahadlokan usab sa siyudad nga posibleng masubli ang trahedyang nahitabo niadtong tuig 1980 diin nalusno ang tulay sa Mananga ug daghang kinabuhi ang naangol sa maong insidente kung dili mahunong ang pagpadayong pagpanguha og mga balas ug graba diha sa sapa.