Ang mga biktima giilang si Engineer Saturnino Plaza,50 ug anak niining si Genar Leo,9 anyos. Ang ilang patay'ng lawas gikuha sa iyang asawa ug mga anak niadtong Lunes diha sa St.Peter’s Funeral Homes ug gidala na ngadto sa ilang balay sa barangay Dumlog ,Talisay city .
Wala pa hinuon mohatag og pamahayag ang mga kabanay sa biktima apan sa migawas nga report sa DyAB kagahapon gikatahong nagplano ang ilang pamilya sa pagdangop sa National Bureau of Investigation aron paimbestigahan ang aksidente kung wala bay foul play nga nahitabo.
Si Rex Deiparine, bayaw sa namatay'ng enhinyero nagkanayon sa mga tigbalita nga di pa sila makahatag og pamahayag tungod kay nagbangutan pa karon ang kabanay ni Plaza.
Sa inisyal nga report sa Cebu Traffic division, si SPO1 Nelson Jayme nagkanayon base usab sa pamahayag sa traffic enforcer nga si Vincent King kinsa maoy unang miresponde nagdilaab na ang kolor puti nga Hyundai Excel nga gimaneho ni Plaza diha sa gibana-banang 300 ka tiil nga bung-aw sa ilang pag-abot.
Nagtuo si King nga posibleng naratol ang driver dihang nakit-ang nagdilaab na ang sakyanan ug gituuhang gisuwayan niini og parking ang sakyanan sa kilid sa bung-aw apan nalahos hinuon kini og kahagbong.
Usa sa gituuhang nakaingon sa pagdilaab mao ang "faulty electrical wirings."
Tungod sa insidente, si CITOM Executive Director Arnel Tancinco mitug-an sa mga tigbalita kagahapon nga makigsabot sila sa DPWH-7 aron pabutangan og mga side guards ang maong dalan ingon man mga traffic signages alang sa kaluwasan sa mga motorista.
Samtang si NBI-7 deputy director Ernesto Macabare dihang gihinabi sa mga tigbalita kagahapon nagkanayon nga andam silang moimbestigar sa maong kaso kung moduol kanila ang banay sa mga Plaza.
Matud pang Macabare nga magdepende hinuon kini sa pangayuong tabang kung teknikal ba og imbestigasyon nga tabang, sa teknikal makatabang sila sa pagpa-awtopsiya sa mga biktima ug ang usa sa imbestigasyon kung duna bay foul play ug kung dunay motibo nagpaluyo. – Report gikan sa The Freeman