Mandaue City hall apektado’s suspension

Naapektohan ang inadlaw-adlaw nga operasyon sa pipila ka buhatan sa Mandaue City Hall sa nahitabong pagsumiter sa ilang resignation letter sa pipila ka mga kawani isip pagpakita sa ilang sempatiya sa pagsuspenso ni Mayor Thadeo Ouano.

Ang mga kawani nga misumiter sa resignation letter naglakip sa pipila ka mga traffic enforcer sa Tedman, clean and green program, casual, garbage collector ug uban pa.

Nunot sa kakuwang sa mga kawani mitumaw karon ang daghang problema nga naglakip sa naglaundok nga basura sa merkado, problema sa trapiko ug daghan pa.

Hinuon si acting Mayor Amadeo Seno miingon nga temporaryo lamang ang nasinati nga problema sanglit nangita man usab karon sila og mga tawo nga ikahulip niini.

Naglakip sa mi-resign mao sila si Cherryl Ouano, executive secretary ni Mayor Ouano ug Lollipop Dizon, chairman sa Miss Mandaue.

Si Seno miingon nga gibahin karon niya ang iyang oras alang sa pagtagad sa iyang mga kaakuhan isip acting mayor sa dakbayan ug ang pagpangampanya isip kandidato sa pagka-mayor sa Mayo 14 nga piniliay.

Giklaro ni Seno nga dili na bag-o alang kaniya ang maong matang sa trabaho sanglit ang pagka acting mayor kasagaran niyang gihimo sa matag higayon nga moadto sa kaulohan alang sa official nga biyahe si Mayor Ouano.