Yoyoy Villame mihimo'g jingle para sa AKAPIN

Ang inila nga singer-comedian nga si Yoyoy Villame mihatag og libreng jingle alang sa grupo sa mga Person's with Disabilities (PWD's) nga nagtinguha og lugar isip usa ka party list sa kongreso.

Si Atty. Jonathan Capanas, dean sa College of Law sa University of San Jose Recoletos nagkanayon nga libre lang nagmugna si Villame og jingle alang sa ilang party list group nga Alyansa ng mga may Kapansanan sa Pilipinas o Akapin.

Matud ni Capanas, kaupat na karon nga piniliay nga nagpasubli ang ilang grupo apan wala sila nakakuha og maskin usa ka puwesto.

Si Capanas nga dunay anak nga buta, mao ang ika tulo nga opisyal sa Akapin.

Matud niya walay resources ang maong grupo ug gasalig lang sila sa kinsay matandog ug magtuo nga ang pagtabang sa mga PWD's mao ang pag "empower" sa nagkalain laing mga paagi.

"Gusto namo usbon ang perception sa public, dili mi mga objects of charity kundili isipa nga partners of development," matud ni Capanas.

Siya nagkanayon nga aduna nay kapin sa 10 million nagkadaiyang disabled persons dire sa Pilipinas.

Ang mga disabled dili lang kakuwang sa pisikal apan apil na ang kakulang sa pangisip.

Kadaghanan sa mga third world countries, diin naglabi ang kapobre aduna gayuy daghan nga mga disabled.

Matud ni Capanas, pipila lang sa mga eskwelahan nga publiko dire sa Pilipinas ang adunay section nga muakatar sa mga special needs sama sa mga buta o bungol nga mga estudyante.

Kulang og mga maestra usab para sa maong section.

Gawas sa edukasyon, maglisod pod og pangita og trabaho ang mga PWD's kini bisan adunay incentive nga nagpaabot sa mga establisamento nga modawat kanila.

"Ang AKAPIN, walay gipili nga relihiyon, rehiyon, estado, edad tungod kay makita nimo ang disable maskin asa nga sector mao nga kinahanglan hatagan og pagtagad," matud ni Capanas.

Kauban ni Capanas nga nangulo sa AKAPIN mao si Navy Captain Oscar Taleon (retired) usa ka buta ug si Dr. Teofilo de la Cruz, usa ka orthopeadically handicapped.