Benhur giisip nga tunok sa mga Martinez - Joey Boy

Gihulagway ni Joey Boy Holganza nga usa ka tunok sa banay'ng Martinez ang kandidatura karon ni Benhur Salimbangon kinsa maoy ikaatbang ni Bogo Mayor Celestino "Tining" Martinez III sa pagka-kongresista karong piniliay sa Mayo ning tuiga diha sa ika-upat nga distrito sa lalawigan.

Si Holganza kinsa magpapili usab sa pagka-bokal ubos sa One Cebu-Kampi party miingon nga dako kaayo ang tsansa ni Benhur nga modaog batok kang Martinez kini base usab sa han-ay karon sa politika diha sa ika-upat nga distrito nahugno na ang liderato sa mga Martinez human ubay-uaby sa mga lider niini ang kaabin na karon sa administrasyon.

Matud pa niini nga si Benhur giisip nga tunok sa mga Martinez karong mga panahuna og kini maoy senyalis sa pagkahugno na sa liderato sa maong pamilya.

Gipadayag niini nga si Kongresista Clavel Asas Martinez walay nahimo diha sa ika-upat nga distrito sulod sa siyam ka tuig nga paglingkod sa Kongreso ug gipasagdan lang ang mga lungsod sa ilang distrito ug karon buot nga magpapili sa pagka-bise gobernador mao pay misuroy panahon sa kampanya diha sa ilang dapit.

Dugang pa niini nga dako na kaayo og bintaha ang ilang grupo ikomparar kang Martinez gumikan kay ang katawhan sa ilang dapit dili na magpahikot sa maong pamilya hinungdan nga kinsa usab kadtong mosuporta sa ilang grupo nga mga lokal nga opisyal hayag kaayo kining mapili sa pagbalik sa ilang pwesto.

Gawas pa ang mayor sa ika-upat nga distrito sa lalawigan anaa kanila ug kang Benhur magsuporta hinungdan nga walay rason nga dili nila mapukan ang kampo ni Martinez.

Gani alang kaniya bisan unsay mahitabo sa ilang kandidatura basta lang molusot si Benhur dili kini nila igsapayan gumikan kay nakahibalo silang daan nga dili pasagdan ang ilang dapit kun makalingkod kini sa Kongreso.