Awto nahulog sa busay; 2 patay

Patay ang usa ka amahan ug ang anak niining batang lalaki nga luwan sa awto human mahulog sa pangpang ug mibuto pagtugpa sa ubos nga bahin pasado alas 9:40 ang takna kagahapon sa buntag diha sa Sitio Maaslom, Busay ning dakbayan sa Sugbu.

Apan sa pagsulat ning balita wala pa mailhi sa kapolisan ang patay nga lawas sa amahan ug anak lalaki nga minor de edad kinsa gidali paghatod sa Perpetual Soccour Hospital human maluto ang ilang kalawasan.

Unang nakabsan sa kinabuhi sa Perpetual Soccour ang anak lalaki alas 12 ang takna sa udto samtang ang amahan namatay pagka alas 12:13 kagahapon.

Ang anak gibana-bana nagpangedaron 12 ngadto sa 14 anyos samtang ang amahan gibanabana nga nagpangedaron og 30 ngadto sa 40 anyos.

Si Kapitan Eliodoro Sanchez sa Busay nga nahinabi sa Banat News mibanabana sa giladmon sa maong pangpang nga mosobra sa usa ka gatus ka tiil ang gitugdunan sa maong awto nga Hyundai GTS 826 kolor puti.

Si Darvy Arcillo, residente sa Busay, kinsa nagmaneho sa iyang multicab nga nagsunod sa mga biktima miingon nga kusog ang dagan sa awto apan wala siya magtuo nga mikalit kini og tipas sa daplin hangtod nga milahos sa pangpang.

Nagdali siya paghunong ug iyang nakita nga nagsiga nang daan ang awto sa dihang mibalitok paingon sa ubos sa pangpang.

Laing nakakita atol sa aksidente si Antedio del Mar, nanag-iya og shop sa mga sakyanan duol sa nahitaboan kinsa nagkanayon nga nasunog nang daan ang awto ug pag-abot sa ubos didto milanog ang sipang buto dayon na sa pagdilaab sa kalayo.

Ang mga residente sa maong dapit maoy mitabang sa mga sakop sa Emergency Rescue Unit Foundation (ERUF) pag-ugkat sa mga biktima.

Matud ni Sanchez sa milabay'ng duha ka tuig dunay sakyanan nga nahulog sa maong dapit dili kaayo lawom ang gitugpahan nga mga 20 ka tiil human masangit sa punuan sa kahoy ug naluwas ang mga sakay niini.

Siya mipahimangno ngadto sa mga motorista nga mag-amping ug pagpahinay og padagan kay gihulagway ni Sanchez nga "accident prone area" ang maong lugar.

Daghang nagtuo nga miagi ang maong sakyanan sa Transcentral Highway paingon sa dakbayan sa Sugbu.

Nunot niini, si Sanchez mimando sa iyang mga tanod nga balikon ug siksikon ang nahagbongan sa awto sa pamasin nga dunay mga identification card ang marekober aron sa pag-ila sa mag-amahan.

Sa gihimong follow-up sa Banat News sa Traffic Division pinaagi ni SPO1 Apolo Machacon nga wala pay nakigkita sa ilang buhatan aron pag-ila sa mga nangamatay'ng biktima.

Base sa rekord nga nasayran sa Banat News nakarehistro ang maong sakyanan sa Land Transportation Office (LTO) ubos sa pangalan ni Saturnino Plaza nga taga Balamban, Cebu niadtong Hunyo 6, 2006.