Si PO3 Napoleon Retuya sa Presinto 3 sa Basak Police Station miila sa biktima nga mao si Jose Manuco Jr., taga Upper Jagobiao sa maong dakbayan.
Giila usab niya ang suspetsado nga mao si Jemmer Amamangpang, hingkod ang panuigon, ulitawo nga taga Santo Rosario, Jagobiao sa maong dakbayan.
Si Rey Barbarin nga nakasaksi sa insidente miasoy kang PO3 Retuya nga nagsabot ang duha sa pagpalit og shabu ug wala kini magkasinabot nga maoy gikasuko sa biktima.
Gihapak sa biktima ang suspetsado sa t-shirt nga gikasuko sa suspetsado kinsa mikuha og kutsilyo ug gihansakan ang dughan sa biktima ug misibat pahilayo sa maong dapit.
Dali nga gidala ang biktima sa Mandaue City Hospital apan gideklarar kini sa mga doktor nga patay na kining nahidangat sa maong tambalanan.
Samtang gisusi karon sa kapolisan sa Presinto Uno ang nagsunod nga pagpangawat og motorsiklo ilawom sa ilang hurisdiksyon. Si PO1 Chester Quiros nga gikahinabi sa Banat News dili pa lang dugay usa ka Tito Iwican ang nagbaklay na lamang nga nahidangat sa ilang buhatan ug mitug-an nga gikawat ang iyang motorsiklo.
Ang maong motorsiklo diha niya gibutang sa parkingan sa may Cortez General Hospital sa Ibabao apan sa iyang pagbalik nahanaw na kini. Kini ang ikatulong insidente sa milabay'ng semana matud pang Quiros nga dunay nawagtangan og motorsiklo sa ilang hurisdiksyon.