Pito nasakmita'g mga armas, bala ug shabu

Gisakmit sa kapolisan ang mga armas ug shabu gikan sa pito ka tawo nga nadakpan sa miaging gabii sa pagpangronda sa sitio Kawayanan, barangay Cambaro, dakbayan sa Mandaue sa miaging gabii.

Ang pagpangronda nga gihimo sa kapolisan sa Presinto 5 sa Opao Police Station ilang gibase sa search warrant nga giluwatan ni Judge Agustin Vestil.

Si SPO1 Jose dela Cruz ug PO2 Bruce, PO1 Chester Quiros sa Presinto 1 miila sa mga nadakpan nga mao sila si Robert Flores, 22, taga Alang-Alang, Joseph Sanoria, 20, ulitawo, taga Cambaro, Chad Avila, 24, ulitawo, taga Cambaro ug Roland Arellano, 22, ulitawo nga taga Sudlon, Maguikay sa maong dakbayan.

Dugang nadakpan nila ni SPO1 Dela Cruz ug mga kauban mao sila si Romulo Anislagon, 19, ulitawo ug kawani sa Mepza nga taga Cambaro ug Umandeo Gomez, 21 nga nagpuyo sa maong dapit.

Lakip sa nasakmit sa kapolisan mao ang duha ka matang sa armas nga may mga buhing bala, pakete nga shabu ug mga linikit sa pinaugang dahon sa marijuana ug uban pa.

Si SPO1 dela Cruz miingon nga ang mga suspetsado nga nadakpan ang mag-atubang og mga kaso nga kalapasan sa ilegal nga paghupot og armas ug ilegal nga drugas.

Matud pa ni SPO1 dela Cruz nga ang mga suspetsado ilang naaktohan nga nag-pot session sa maong dapit nga maoy nakaingon nga ang maong mga dinakpan ang mag-atubang og mga kaso nga kalapasan sa Republic Act 9165 kun paggamit o pagpamaligya og shabu.