John-John Osmeña ipa-extradite ni Cuenco gikan sa US tungod sa kaso sa P3.6 bilyones nga kemikal

Ipaubos na lang gyud sa usa ka extradition si kanhi bise gobernador John-John Gregory Osmeña sa taga Department of Justice (DOJ) kun gusto gyud sa maong ahensya nga magukod ang kanhi bise gobernador sa illegal nga kalambigitan niini sa shipment sa 3.6 bilyones ka pesos nga pseudoephedrine kahimanan sa paggama sa ginadiling drogas.

Kahinumduman nga niadtong Marso 2004 nasakmit sa mga sakop sa Philippine Drugs Enforcement Agency (PDEA) ang kapin sa 1,770 ka kilo nga Pseudoephedrine diha sa usa ka pantalan ning dakbayan sa Sugbu gikan sa nasud sa China.

Sumala pa ni Cuenco nga nahuman na ang iyang trabaho isip kongresista pagpanday og balaudnon aron mataral kadtong mga malapason sa illegal nga kalihukan hinungdan nga kun dedicated ang mga sakop sa (DOJ) sa trabaho niini gikinahanglang mohimo kini'g aksyon.

Gipadayag niini nga trabaho sa DOJ ang pagpangitag paagi sa pagpangitag dugang ebidensya o kaha paggukod niadtong mga kriminal nga nisibat gawas sa nasud.

Matud pa niini nga magamit sa DOJ ang kasabutan sa nasud tali sa Amerika nga Extradition Treaty kini kun gusto gyud sa maong ahensya ug kun ugaling malutsan man gani sa warrant of arrest ang kanhi gobernador gikan sa korte.

Samtang sa pikas nga bahin si Cuenco mipasalig nga kun ugaling makalingkod siya balik sa kongreso iyang unahon sa paghimog lakang ang pagsabot-sabot alang sa compromise ngadto kang Joseph Yu usa sa mga suspetsado sa megashabu laboratory diha dakbayan sa Mandaue pipila na katuig ang nakalabay.

Matud pa ni Cuenco nga iyang pangunayan sa paglihok ang maong kaso aron mosugot si Yu pinaagi sa bargaining nga paus-osan ang silot niini basta lang motug-an kun si kinsa ang ilang mga lokal contact pagtukod sa maong shabu laboratory.

Hinuon iyang giklaro nga gikinahanglan usab og dunay pagtugot sa committee on drugs ingon man sa National Bureau of Investigation (NBI) labot sa maong issue gumikan kay para kaniya inutil ang maong ahensya pagtumbok sa mga lokal kontak niini.

Gitataw niini nga si Yu lang gayud maoy nagdala sa yawi kun si kinsa ang maong mga lokal contact gumikan kay kini maoy nag-bayad sa abangan sa mga tag-iya sa maong laboratory ug nagpili sa lugar nga kabutangan sa maong laboratory.